利物浦紐卡素有回報
文： 黃興桂 26/04/2008
足球、籃球踏入季尾，好戲連場，歐洲各國聯賽以至歐聯到左大直路，而ＮＢＡ方面亦展開季後賽，如果強隊可以悉數晉級，屆時戰況勢必更精彩。先講過去周中兩場歐聯，可以話係峰迴路轉，車路士劣勢之下，竟然幸運逼和利物浦，由地獄上番天堂。曼聯將十二碼交畀當紅小生Ｃ朗主射卻宴客，呢D就係足球比賽引人入勝之處。
歐聯四強呢類大戰，因為戰術需要，場面上好少出現鬥攻情況，雙方都會以穩陣為先，或者有人會嫌悶，但其實睇一眾防守球員O係沉重壓力之下比賽，仍然極少出錯，真係值得大家欣賞，相信作為行內人都會收貨。
車仔讓唔起曼聯
講番今晚英超賽事，Peter睇好三支客軍，要曼聯下盤、兩場平手盤則捧利物浦同紐卡素，整條三串一。車路士話就話要盡最後努力爭取聯賽冠軍，但O係歐聯因素，以及今季整體表現唔及曼聯情況下，實在讓唔起平半。至於利物浦原本O係聯賽已經冇乜目標，不過上仗歐聯意外痛失優勢，對士氣難免有所打擊，今場更加唔想再衰，就算係出後備，一眾二線兵都會照搏，對手伯明翰礙於質素惡唔出樣，平手盤Peter睇好利物浦。
紐卡素作客韋斯咸，部分韋斯咸球員早已同領隊古比士利不和，戰意令人懷疑，反而紐卡素愈踢愈好，奧雲狀態當弗，可以追捧啦！
