今周香港球迷最大喜訊,應該係曼城、祖雲達斯齊齊落實來港,感受「本地波」獨有雙料娛樂!有時波男真係覺得Steven寵壞晒班波迷,一張飛睇兩支歐洲勁旅,去邊度搵?
記得早年本地波辦親外隊,總會出現貨不對辦,稍為知道個名球員,都會因各種理由甩底,搞到港迷冇晒信心。但時代唔同啦,依家乜都講求保障,簽晒約冇得奸茅!屈指一算,由舊年暑假開始,波男已先後香江見過謝拉特、費蘭度托利斯、亨利、朗拿甸奴及碧咸等一級球星,緊仲要有尼維特同迪比亞路,諗落都興奮。
玩足五個鐘咪嫌貴
所以,波男認為緊「英超意甲同樂日」,真係唔可以錯過。有朋友問波男,點解Steven今次唔益街坊,將門票定低。但老實講,最高票價五百八十蚊已經唔算貴,話晒雙料娛樂喎,夾夾埋埋玩成五個鐘,平時外國歌手獻唱,都係唱粒幾鐘咋,有飛仲要成千銀,唔好再嫌貴啦老友。
除此之外,波男亦有一個提議,就係球迷大可於「5.22」當日,效法七人欖球賽,扮鬼扮馬入場,實行娛人娛己,將氣氛升溫,就算祖記打唔出水準,都值回票價嘛。波男相信搞氣氛能力,唔係外國人先識!
http://football.on.cc/football/new/20080412/fbnewc0151x0.html