有牛頭唔搭馬咀形, 鄉音未清形, 以及私自翻譯形, 以下是本人之親身經歷….
Case 1. 牛頭唔搭馬咀形:
本人: 你好, 電話查詢, 請問有咩幫到你?
亞嬋: 唔該豐明銀行呀!
本人: 請問要邊區呢?
亞嬋: 有邊區呀?
本人: 有銅鑼灣, 中環, 尖沙咀, 屯門
亞嬋: 咁要元朗啦!
本人: 小姐, 唔好意思, 無元朗區喎!
亞嬋: 咁有邊區呀?
本人: (*…又講多次) 係有銅鑼灣, 中環, 尖沙咀, 屯門
亞嬋: 咁元朗呢?
本人: (你老*, 本人唔想再拖) 小姐, 無元朗區架, 或者比最近屯門分行你啦
亞嬋: 唉…咁麻煩架, 是但喇!
本人: (咁唔願意唔好要嘛) 係, 請記低號碼….
Case 2. 鄉音未清形
本人: 你好, 電話查詢, 請問有咩幫到你?
亞伯: 唔該蓮學疆屍呀!
本人: (已經想笑) 唔好意思, 係咪蓮花個蓮呀?
亞伯: 唔係呀, 蓮學個蓮呀!
本人: (*…講左等如無講) 咁係咪學年掉返轉呀?
亞伯: 都話唔係咯, 呢…..蓮學航空個蓮學呀!
本人:（*．．．） 聯合呀???
亞伯: 咪係囉!
本人: (仲覺得自己o岩) 咁請問疆屍又係咩呢?
亞伯: 一間間果d疆屍呀!
本人: (本人被激得半死) 哦! 公司o下話?! 請記低號碼啦….
Case 3 鄉音未清形
本人: 你好, 電話查詢, 請問有咩幫到你?
嬋: 唔該要徐若瑄電話呀! 晌交易廣場架!
本人: (猛抓頭皮.徐若瑄黎左香港咩???) 小姐, 請問係私人定公司電話黎架?
亞嬋: 唔係呀! 係酒家黎架!
本人: (酒家??? 本人靈機一觸) 係咪翠玉軒呀?
亞嬋: 係呀, 唔該!!
本人: (笑到面都紅埋) 請記低號碼….
Case 4 私自翻譯形
本人: 你好, 電話查詢, 請問有咩幫到你?
亞叔: 唔該觀塘區o既愛迪特呀!
本人: 請問係咪愛心個愛, 超人迪加個迪, 特別個特呢?
亞叔: 係, 無錯!
本人: 唔好意思, 無呢個名登記喎!
亞叔: 無理由喎, 好大間公司架喎!
本人: 先生, 咁或者有無英文名架!
亞叔: 有, 我串比你聽, 係 A….D….I.…D….A….S
本人: (唉….一早講啦) 哦! Adidas呀! 請記低號碼….
註:*係粗口
