七姊妹心願未了 電視劇〈七姊妹〉係講七個義結金蘭o既女鬼o既故事。其實，現實生活中感情好o既姊妹多的是，有好多故事都比得上「七姊妹」咁感人，今次故事裡面o既主角都係咁好感情。 「麻煩你o地認清楚佢係唔係歐陽家敏？」警察向住死者六個朋友講。 「係！」年紀最細o既Bo Bo一眼就認出前面訓o係病床上面o既係自己o既三家姐阿敏。 辦完認屍手續之後，六姊妹個個都神情悲傷咁離開醫院。佢o地傍晚接到警方通知，話有一具懷疑係佢o地三家姐o既女屍被發現o係海邊浮o下浮o下，要求佢o地六個即刻趕去認屍。六姊妹知道阿敏遇害後都非常傷心，離開醫院後，佢o地相約第二日一早去辦理阿敏身後事之後就各自返屋企抖抖。 Bo Bo同二家姐一齊住，一返到屋企，Bo Bo就先入去廁所沖涼，諗住沖完涼就快快趣趣去訓覺。點知沖沖o下涼竟然發覺浴簾外面好似有人企o左o係度。 「唔通二家姐入o左o黎？」Bo Bo心諗。 「係咪二家姐呀？」Bo Bo向住浴簾外面大聲嗌。不過等o左一陣外面依然冇人應。於是Bo Bo突然拉開塊浴簾，簾外面果然人影都冇個，不過Bo Bo見到塊鏡上面好似寫o左o的o野。 「『Bo』『Bo』『我』『對』『唔』『住』『大』『家』『三』『家』『姐』」Bo Bo跟住o的字讀完之後，嚇到大嗌出o黎。 原來塊鏡因為Bo Bo沖涼所造成o既水蒸汽而變得白濛濛一遍，不過就零零舍舍好似俾人用手指寫o左以上幾個字咁。但係浴室裡面就只有Bo Bo一個，二家姐又話自己一直o係房冇出過o黎。究竟之前係邊個企o係浴簾外面？又係邊個o係鏡上面寫字呢？唔通真係三家姐返o左o黎？一諗到呢度，Bo Bo驚到衫都唔著就跑出浴室，然後打電話俾其他姊妹。 「大家姐！頭先三家姐好似o黎過我度呀！」Bo Bo跑出浴室後即刻打電話俾大家姐。 「頭先佢都好似o黎過我度呀！」大家姐都荒失失話，「頭先我o係屋企望出街o個陣，好似o係玻璃窗o既倒影上面見到阿敏出現，不過一擰轉身就見唔到佢。可能真係佢返o黎搵我o地喎！」 「唔通三家姐佢有o野要同我o地講？不如我o地鎮靜o的坐o係度等佢再o黎啦！大家姊妹一場，我諗佢唔係o黎嚇我o地o既！」Bo Bo建議。 卒之呢三姊妹就成晚坐o係度等三家姐出現，不過坐o左兩個鐘頭乜都等唔到，坐坐o下三個人仲不約而同訓著o左。突然間！Bo Bo見到三家姐坐o係佢側邊輕輕力搖醒自己。 「Bo Bo！Bo Bo！對唔住呀！我一個人走先喇！你o地唔好掛住我喇！」三家姐阿敏講。 「三家姐！點解你會出事o架？係咪有人害死你o架？你唔好走啦！」Bo Bo扯住阿敏話。 「唔關人o地o既事！係我自己一時睇唔開o者！跳落海之後我已經好後悔！你o地千祈唔好好似我咁呀！仲有要俾心機讀書，大家要互相照顧呀！我走喇！保重呀！」阿敏講完之後就慢慢消失。跟住Bo Bo就即刻醒o左，佢立即叫醒二家姐同打電話俾大家姐。 「我頭先見到三家姐呀！」Bo Bo都未講完大家姐都不約而同講出同一句說話。 「我頭先突然醒o左，跟住就見到阿敏壓o係我背脊上面，我想側身睇，但係又郁唔到，想叫又叫唔出，佢都係同我講同一番說話，講完之後就走o左。」大家姐話。 「但係點解我乜都見唔到？」二家姐話。 「算啦！而家乜都唔好理，等聽朝先算啦！」大家姐話。 第二朝一早，四家姐就拎住份報紙上Bo Bo屋企。報紙上面大大隻字話阿敏係為情自殺，雖然咁多個姊妹都唔信，因為一直都冇聽過阿敏有情人，但係事情最後都得到證實。當大家o係阿敏o既靈堂守夜當晚，阿敏再o係姊妹面前現身，又叫大家原諒佢咁冇用，竟然玩自殺；又話要大家原諒佢一直冇同佢o地講自己拍緊拖，暪住大家好唔好意思。講完之後，阿敏就冇再現身，而大家都依然咁掛住佢。
