相信好多朋友讀書嗰陣都有唔少關於學校嘅鬼故, 通常都係同廁所有關, 今次我呢個經歷都係一樣。
記得我讀小學嗰陣, 應該大約5,6年級到, 如果大家仲記得我前幾篇曾經提過, 我以前讀嘅小學, 內牆嘅主色係青綠色, 再加埋d燈光, 就搞到好似周圍發青光咁, 日光日白都已經覺得陰森, 黃昏無陽光, 環境氣氛就更加鬼異。唔知係咪咁嘅原因, 所以有唔少鬼故就不徑而走。
記得我嗰個年代仲有學能考試, 所以一個星期有幾日放咗學之後仲要留喺學校做埋d學能測驗試題,我係返下午校嘅, 所以撞啱呢幾日, 就更加要留喺學校到夜晚。你諗吓, 除咗自己個課室之外, 成層走廊都熄晒燈,你都咪話唔恐怖。嗰陣時,唔知邊度開始傳起話某層樓嘅廁所有朋友仔, d女仔話去親嗰個廁所都覺得好似成日有人望住佢地, 但係次次都見唔到有d咩, 所以次次去完廁所, 洗手嗰陣都洗快d, 因為佢地話驚喺塊鏡到見到朋友仔喎。
咁好啦, 每次留喺學校做學能測驗, 老師都會係中間放15分鐘小息, 坐咁耐, 我都要去廁所架, 我就去咗傳聞中嘅廁所, 去到廁所門口, 我都有d怯怯地, 因為d顏色真係好青bb,感覺好差, 我去到搵咗最近門口嘅第一格廁所, 一路方便緊我都覺得好似俾人監視咁 , 一路去一路驚, 但環顧自己去緊嗰格都無咩喎, 咁就照常出去洗手, 唔望塊鏡尤是可, 一望我就見到有一隻好大嘅眼睛喺第三格嘅牆身同天花之間 ~~我以為會唔會自己眼花睇錯, 但係又唔敢抬高頭望真d塊鏡喎(驚隻眼發現,會望番我),所以一路洗手,一路dup底頭微微望住塊鏡, 今次我好肯定係一隻眼, 仲要係好大,如果按比例, 應該有半個拳頭咁大 ,唔同我地正常人嘅眼睛。總之得自己一個喺廁所度, 仲要見到d咁嘅野, 仲唔嗱嗱林走咩。
我無將呢件事同番d女同學講, 因為一來驚嚇親佢地, 二來驚佢地大肆宣揚, 到時驚動到學校就麻煩啦。不過同d熟嘅好朋友,就會提佢地盡量唔好去第三格囉, 佢地都有問我點解, 唔通我同佢地講話有隻眼望住佢地去廁所咩, 咪惟有同佢地講話feel到有, 但唔肯定, 等佢地自己估估吓囉, 反正一早已經有傳聞, 佢地唔會覺得太驚嚇吖嘛~~~
不過,我起碼知道個廁所有野, 所以自此之後, 我盡量唔去呢個廁所, 去其他樓層。
