$640可練少林絕學
不要以為少林絕技已經失傳,
要做武林高手的夢想早已幻滅,原來仲有機會。
少林寺大師昨日同Emily講,
香港人精神壓力大,又少運動,
好適合練少林功夫修心養性。
Emily即刻問大師,究竟「鐵頭功」、「金剛腿」兩種絕技邊樣更適合香港人?
怎知大師的答案相當出人意表,竟然係《易筋經》!
大嶼山少林文化中心開幕
少林寺在大嶼山開辦的武術文化中心昨日正式開幕,
請到外交部駐港特派員呂新華、中聯辦副主任黎桂康同民政事務局長曾德成等等出席。
12歲已經開始習武的少林俗家弟子汪猛話,《易筋經》內功其實好適合初學者,
而進一級就可以學少林拳或羅漢拳……剛剛同金庸小說倒轉。
昨日的開幕禮,香港少林安排了幾名首批受訓的小弟子表演連環拳同五步拳,
功架似模似樣。負責人話,小弟子他朝學有所成,
仲有機會到河南嵩山少林深造。事實上,少林功夫博大精深,
好武術者當然趨之若騖,但今時今日要學絕技不能單靠誠意,
上山學藝也要有「實際」付出。要學易筋經、韋馱十八勢等武俠奇功,最低消費盛惠640元。
講番開幕禮現場,Emily昨日「千里迢迢」走入大嶼山,其實都係為
德成局長同幾位駐港高官,怎知正當我想上前寒暄兩句,
幾位主禮家賓已閃身離開,莫非各位官老爺領悟力強,即場學懂幾招少林「輕功」,齊齊鬆人?