1991年12月， 我在唸中三，某晚在補習社聽到以下一段對話：
女生A：「哎呀 , 今朝睇《金電視》見到劉德華一張相，好靚仔、好型，我愛死他啦！」
女生B一臉不屑：「唓，劉德華靚仔咩？」
女生C此時插嘴：「黎明先靚仔呀！」
「係呀係呀，黎明靚仔呀！！！哈哈哈哈哈！」女生B興奮得不停拍枱歡呼，身體也不停的上下晃動，女生C見狀即二話不說地配合著，我便眼睜睜看著兩個女生在我面前UN嚟UN去！
一星期後，同樣是在補習社，我又聽到以下一段對話：
女生A：「唔（尾音拉長約十秒），我好耐冇見過黎明啦，我掛死他啦！」
【嘩，才一個禮拜已經捨棄了劉德華而投入黎明的懷抱，不留戀過去、向前看、勇敢果斷的精神令小弟深感佩服！】
「妳冇睇《人在邊緣》咩？禽晚佢同呀劉青雲嗌交嗰幕幾型呀，型到我成晚諗住佢個樣開心到瞓唔著呀.....」女生B這番話表面上是看著女生A說，實情望著天花板自己和自己說，還要手輕托著香腮，一副含羞答答、甜絲絲的模樣。
【我望著女生B，覺得她的願望並非想藉著補習改善自己成績，而是希望將黎明私有化。加油呀女生B，俾啲信心妳自己，妳電架！】
女生A悶嘆了一聲：「妳就好啦，我阿媽叫我溫好啲書，所以呢排唔俾我睇電視呀，連錄都唔俾我錄呀！點算呀，見唔到黎明我啲日子點過呀？我唔要呀，我唔要見到咁樣呀！」
「唔駛怕，我幫你錄囉！過多一排趁妳阿媽出咗街嗰陣睇番咪得囉！我唔信妳阿媽唔出街呀，黎明咁靚仔唔睇唔得架，唔睇唔得架！」女生B忽然儼如總統候選人在台上發表拉票言論般能言善道。
女生A聽了後隨即兩眼發光地說：「好呀好呀，我可以見番黎明啦，黎明真係好靚仔，我愛死他啦！」
「係呀係呀，黎明真係好靚仔，哈哈哈哈哈！」女生B興奮得不停拍抬歡呼，女生A見狀即二話不說地配合著。【唔係又嚟多次呀嘛？妳咪呀妳！我報警架！】
正欲開始準備UN的女生B瞧見我一臉驚恐地望著她，忽然對我咧嘴而笑：「喂王建勳，你話黎明靚唔靚仔先？」
【我覺得黎明真係唔靚仔哩，你哋咁好咁啦，我想補習呀！】我當然沒有將這番說出口，否則後果堪虞，我不想成為這間補習社最快退學的學生。
「哈哈哈哈哈哈哈‧‧‧‧‧」
「你笑即係承認黎明靚仔啦，你睇下你把頭髮梳到同黎明一樣我就知你咩啦！」
【嘩，妳咁都可以拉埋一齊嚟講呀，妳唔好話我同黎明都係男人！？】
「哈哈哈哈哈哈哈‧‧‧‧‧」喺呢一刻，我除咗繼續出力笑之外，真係唔知可以講啲乜！
那晚我補完習回家，甫一進入家門便看見老媽目不轉睛地盯著電視螢光幕，嘴角泛著微笑：「番嚟啦？快啲嚟睇《人在邊緣》吖，黎明真係好靚仔呀！」
