朋友S 都係先前既故事出現過,就係走廊及LIFT見到鬼果個,佢本身已經係一個已婚婦人,仲有一仔一女,樂也融融
大約係2001-2002 其間佢同老公都搬左入將軍澳道馬X塘村既村屋入面住,小朋友就住係奶奶度,所以佢地都好自由,S 本身都係煮婦一名,唔洗返工,所以以前經常招呼我地呢D 豬朋狗友返屋企燒野食打麻雀作樂,每到星期六唔出去浦就係果度不夜天了.原來S 既作息亦開始轉變,日頭只有埋頭大睡,夜晚先起身去玩去食去浦,原來其中有一個主因,由唔知幾時開始,S 夢中都會有一個男人出現,初初係幾日先見到一次,但之後就日日都會夢到,但S 形容番,佢最初既時候係完全望唔清呢個男人既樣,只係知道"丫,係你啦"咁樣為証.夢中既S 同呢個男人,好開心,好甜蜜,仲拍起拖上黎好似普通熱戀既戀人一樣,行街食飯,談情.但有時S 訓訓下會扎醒或比其他電話聲嘈醒之類,佢就有理無理,繼續訓番,去追番先前失去既夢中片段,但好奇怪,每次佢一訓番,幾乎都立即可以見回夢中情郎,雖然未必去番先前既情形,但都會去左第二度,照樣同呢個男人談話傾計.其實呢個時候S 已經成日覺得訓得唔夠同埋個人好疲累,同埋永遠都係日頭訓,夜晚先起身活動,好耐都未見過陽光,亦都好少陪仔女出外活動, 往往都係S 老公楂車接D 仔女去佢地度過夜,S唔願出街佢只沈醉於佢既夢鄉同佢入面既愛郎,當時佢甚至於好抗拒佢老公,唔想望到佢老公及掂到佢.呢D 都係事後佢自己發覺, 當時佢完全唔知自己點解有咁既情緒, 況且往往會夜浦到天光先返屋企,咁可以避免見到佢老公.
呢種咁既生活大約都維持左有一年,至於夢中既男人由開始時既模糊,慢慢個樣貌越黎越清晰, 到最後S 係完全可以見到呢個男人既成個模樣
真至有一次,佢兩三歲既仔,當佢地係房既時候,就係度不停喊,同S 講"有隻豬好醜好核突仲走緊埋黎呀嗚嗚",小朋友勁驚S 當然又痛心又激氣咁對住空氣狂鬧
之後咁啱佢有一個朋友懷疑比野攪,就拉埋S去天水圍一個學茅山既師傅度睇下點對付,S順便就問下成日嚇佢個仔隻野問題,點知師傅同佢講,佢個仔見到既豬既物體只不過係附近山精既幻化形象,其實好可能小朋友心智未開咁啱先比佢見到, 問題不大,反而,師傅同佢講,S 大有D唔好既野就真,S 話佢唔知喎,點知師傅答左佢一句"你唔知,你無可能唔知架噃"S 當時都打左個窒,唔通.....師傅就係話夢中愛郎呢件事.............最後S 唯有和盤托出呢件事
師傅就同佢講,呢d 案件其實係有好多發生,最壞既情況,係事主會用自殺黎落去陪佢既愛人,S 聽到個心好亂,唔知點算好,師傅主張收左佢,因為唔可以比佢有機會再向S 落迷藥既,S 聽完呢番說話之後,結果..............
甜夢?惡夢??(下)
S當時心亂如麻,茅山師傅又不停陳述比鬼迷的例子,所以S 立下決心,當場就叫師傅收左呢個情人鬼魂了.........
點知佢返屋企搭車既途中,就開始後悔了,點解要捉左佢,咪以後都見唔到佢???返到屋企後,淚水已經充斥著全塊面了......誰知無左呢個情人夢,竟然係另一個惡夢既開始,係就係無左呢個男人係夢中入面,取而代知既係, 當佢入睡之際,就會比鬼責,責到佢好辛苦, 抖唔到氣,仲要每一次佢一訓覺就會責佢, 攪到佢身心俱疲,後期S 唔洗訓著,只要一閉埋對眼,D 野就即刻黎搵佢了.試過有一次同呢股力量抗衡,S 爭緊拳頭咬實牙根同佢力爭到底, 點知醒起全身出哂汗,個人虛脫到不得了....最厲害既一次,S 個心唔想再同佢鬥,心諗你責就責飽佢,個身放鬆哂,好啦, 咁就死火啦,佢個人好似離魂咁,成個比人抽起玩過山車,將佢撻上撻落,天旋地轉, 感覺到唔只係一個鬼魂玩佢,而係一群鬼魂遭質佢,眼見自己個肉體訓係張床度, 佢知道一定要返入去,幾經爭扎,先能夠醒左,全身好似比人打左一身咁標哂泠汗,呢個時候,S 就去搵一個曾經幫佢安土地師傅 -仁哥 (注一)
因為先前呢間屋既土地係仁哥幫佢請番黎睇住既, 點知果日仁哥收到S 電話再次入去馬X塘佢屋企時,原來發現左個土地已經一早走左,此話何解,之後仁哥師公上身問過究竟,原來S 間屋就係呢條村祠堂隔兩間位置,先前S 夢中既情郎係佢地祠堂既一員黎,佢地其他入面既靈體知道左呢個成員比S 叫師傅收左去, 成班老羞成怒, 一定要攪到S 家無寧日,唔要佢有好日子過,之後仁哥再CHECK 番幫佢請番黎既土地,原來仁哥先前都低估左呢度既力量,原先既地主原來一早比呢度既陀地祠堂群鬼打走左,每次S 上既香供奉,原來就係供奉番比陀地群鬼,所以點解S 係屋企D鬼都可以肆無忌憚咁出出入入了.後來仁哥請番一個佢地祠堂果邊一隻鬼黎做家神,已經講掂數會賜予一D 法力比佢,當做幫忙睇睇S家宅做其地主,但原來有一點幾有趣,原來請番黎既家神,佢地都會有要求,有D會想飲酒, 有D想食肉,有D想食素黎供奉等,仁哥就問呢個家神有咩要求,呢個土地竟然答",唔該叫佢地清理我間屋先,好嗚嘈, 有屎" 之後佢地出去睇土地係有個屋頂仔, 上面真係有D 雀屎係度
而家仁哥同S 做埋封屋儀式,令到其他鬼魂無咁易入到屋.S 後來同我講番,封完屋及請左新土地之後,陀地群知道攪唔到佢,好嬲,有次佢同老公果時訓緊覺時, 佢老公熟睡緊完全聽唔到任何聲音,佢就聽到有人係度拍窗"彭彭彭"不停咁拍,之後S 聽到一把聲係窗口度大叫"XXX(S 中文名)你同我出黎,!"S 係屋企入面答佢"我唔出黎呀, 吹咩"
經過呢次之後,S 故然無再見過情郎,但同時間亦無再比其他鬼魂打擾,之後再過幾個月就搬走了, 所以佢既甜夢係咪等如惡夢???
(注一)我想講下係仁哥,佢大約三十幾歲大大眼睛,光頭,個樣好和善,但不善令辭,佢係佢地供奉既師公教派門主,佢仲有師傅同好多師兄弟,反而佢應該係能力過其他人佢先做門主既.點解我會知道呢, 因為我同S 既共同朋友又或者我一D 朋友都搵過仁哥幫忙,佢地個館每個月得一日會開放,我直情去過睇過係咩環境.仁哥本身有份職業既,業餘就幫人捉鬼問野咁,佢幫人捉鬼問事係唔收錢, 只收利是, 利是係悉隋尊便既無規定, 之後呢D 利是仁哥會全數拎番會館作為經費,佢自己豪無得益的(因為有時我地晨時某時都CALL 佢 過黎, 佢自己楂車黎真係油錢都會蝕埋架.所以我相信仁哥絶對唔係呃神騙鬼既人黎,仁哥仲上電台做過訪問TIM,但我當場見過佢作法幾次, 佢由原本一個好友善既樣,可以變做一個好惡(衰D 講好凶狠既樣)完全變左另一個人,好有威嚴感, 我地其他人既都感覺好有壓逼感抖及抖唔到氣咁,但作法完又變化先前完來既樣,想問佢野, 佢要諗好耐先講到因為佢其實唔太識講野,絶無半點花言巧語,唔太識點表達既人黎,同埋佢地既教派唔係咁主張隋便消滅鬼魂既, 佢地捉左番去後會試下教化或用超渡儀式盡量幫呢D 鬼魂,其實我覺得咁反而係好既
我所講既仁哥絶唔係係度吹噓D 咩,只不過係將我所見所聞既野係度分享比大家聽,希望大家唔好見怪
