夢裡的她 檔案號碼：014 日期：2002年4月18日 人物：Candy 夢裡的她 早上，有個年約十六、七歲的少女戰戰競競地走進拿拿淋和CY的事務所。 少女：「請問……呢度係咪死人習作事務所？」 拿：「你搵o岩地方喇。」CY：「你點稱呼呀？有咩可以幫到你呢？」 少女：「我叫Candy，我……我遇到件好可怕o既事。」Candy樣貌本來十分可愛，但此刻她面容憔悴，還有很深的黑眼圈，精神狀態明顯欠佳。 拿：「Candy你唔好咁緊張，坐低放鬆自己，再將問題講俾我o地知啦。」 Candy深呼吸了數下，冷靜下來後，說：「過去一個禮拜，我每晚訓覺都夢見有個女仔出現。佢一路望住我，眼神好絕望；佢帶住懇求o既神情，好似有o野同我講，但我一句都聽唔到。因為咁，我呢七日冇日可以訓得安寧。」拿：「你懷疑夢裡面o既女仔係靈體，佢想向你報夢？」Candy一臉不安，點了點頭。 CY：「如果你唔介意，我o地想去你間屋睇睇，咁就最快可以知道你係咪俾靈體纏住。」Candy懇求地說：「唔該你o地今晚就o黎啦！再係咁落去我會黐線o架!」拿：「放心啦，我o地好有信心可以幫你解決問題。」 當晚，拿拿淋和CY去了Candy的家，並仔細檢查客廳和房間，尤其是房間，幾乎每個角落都查察得清清楚楚。CY：「我的確感覺到呢間屋有少少唔妥，但始終冇發現；你間房o既陰氣唔算重，應該冇任何靈體o向度，咁點解你會發o個個夢呢？真係奇怪。」 Candy：「唔係哩！我真係覺得唔妥，唔係心理作用哩！」 拿：「不如咁啦，我o地暫時留o向度陪你，直至你訓著為止，有咩問題我o地都可以即刻發現。」Candy仍有點擔心，但唯有無奈地說：「咁冇法啦！我而家就上床休息。」 拿拿淋和CY在客廳看電視，打算待Candy熟睡時再看看她有否異狀；但Candy在睡了不夠30分鐘，便突然驚醒過來，驚惶大叫。拿拿淋和CY馬上衝進房間察看Candy的狀況，只見她滿身冷汗。 Candy：「我……我又發夢見到o個個女仔喇！我第……第一次聽到佢講o野，佢猛咁話：『你救我啦！只有你幫到我！』我根本都唔識佢，更加唔知道點幫佢，點算好呀？」 CY重新檢查Candy的房間一次，結果仍是沒有發現。CY輕聲對拿拿淋說：「間房明明冇料到，點解Candy堅持話有o野呢？」拿：「唔通Candy唔係撞鬼，只不過係神經緊張？」 苦無結果，拿拿淋和CY也別無他法。告訴Candy屋中並無問題，並勸她不要多想。Candy本是老大不願，但最終還需讓拿拿淋和CY離去。 這時屋中剩下Candy一人時。因為剛才受驚過度出了一身冷汗，於是往浴室淋浴。但她發現浴室的雲石地板上竟然起了變化，其中一塊地板竟浮現出一張女性面孔。Candy覺得面孔很熟悉，再望真點，發覺正就是她夢中所見到的那個女孩子的臉。 Candy嚇得魂不附體，衝出浴室，並致電向剛離開不久的拿拿淋和CY求救。不消一會，拿拿淋和CY已折返Candy的家。 拿拿淋狀甚緊張，問：「Candy你發生咩事呀？點解頭先o個電話嗌得咁大聲o牙？」 Candy：「我……我……浴室……浴室裡面……」CY馬上衝入浴室查看，拿拿淋緊隨其後，但內裡一切正常，毫無異樣。CY：「浴室裡面乜都冇！」 Candy緊張得幾乎哭了出來，並將剛才目睹那張「臉」的事告訴了CY。 拿：「會唔會係你睇錯呀？」Candy：「係千真萬確o架！」CY：「咪諗咁多，你都係早o的訓啦！」 拿拿淋和CY覺得Candy只是神經過敏，於是打算離開浴室，怎料一轉身，Candy又再見到那張「臉」浮現出來。Candy張惶大叫：「你o地睇o下，佢又出現喇！」 拿拿淋和CY覺得事有蹺蹊，於是決定開天眼看看浴室內藏著什麼。 拿：「幫幫手！我要開眼睇睇！」CY將手搭向拿拿淋，把靈力傳過來，說：「好！」 開眼一看，拿拿淋終於看到雲石地板真的浮現著一張女性的臉，肯定有靈體存在。拿拿淋和CY今次百密一疏，雖詳細檢查過Candy的房間，但沒想到靈體其實在浴室內。 後記：拿拿淋和CY將那塊雲石地板敲碎、撬開，發現下面藏了一具已腐爛的女屍。三人馬上報警，交由警方處理。初步懷疑Candy上一手住客殺了人，將屍體埋於地板下；而女死者冤魂不息，所以透過報夢向Candy求救，最終揭發了這宗命案
