碧咸大日子英軍助興
文： 黃興桂 26/03/2008
今晚國際熱身賽戲碼十足，大家最關心當然係萬人迷碧咸會否第一百次為國家隊上陣，雖然卡比路已經欽點左里奧費迪南做隊長，但應該都會讓碧咸一圓百場心願。碧咸多年來為國家隊立下不少汗馬功勞，地位超然，新一輩國腳對佢亦非常尊重，今場定必每人走多步，為呢位前任隊長留下美好回憶。法國攻力一直為人詬病，今場仲要缺少亨利同新紮射手賓施馬，縱有主場之利都冇必勝把握，法國讓平半，下盤可以放心捧場。
卡比路上任後，英格蘭整體士氣無疑比以往好，充分反映一位出色領隊對球隊有幾重要，現時英超爭霸曼聯能夠脫穎而出，某程度上亦因為費爵爺領導有方，車路士星味雖然拍得住曼聯，但最弊領隊格蘭只係平庸之輩，佢不僅無法駕馭一班球星，球隊稍有失準更慘成箭靶，內部士氣有問題，要從後追上奪標並唔容易。
英超已成曼聯囊中物
至於另外兩支Big4球隊，利物浦領隊賓尼迪斯只係擅長應付盃賽，聯賽不值一提；阿仙奴領隊雲格既青訓收成有目共睹，可惜現階段陣中主力仍嫌幼嫩，佢地近期頻頻失分，要及時收拾心情並唔容易。曼聯雖然並非無懈可擊，但泰維斯、朗尼同C朗呢個進攻鐵三角威力的確驚人，而且仲有傑斯、拿尼O係後備席上隨時候命，加上里奧費迪南同尼曼查維迪呢對穩健中堅組合，除非紅魔鬼於最後階段自毀長城，否則今季英超冠軍應係曼聯囊中物。
===============================================================
即係話車仔奪標有望, 阿記可以及時收拾心情啦 多謝桂神!!
