兩支「黃軍」巴西同瑞典今晚將於阿仙奴阿聯酋航空球場踢熱身賽，雙方皆有進攻重心缺陣，森巴兵團冇卡卡，而瑞典則失去伊巴謙莫域，全面削弱入波機會，而且因為係熱身賽，兩隊戰意成疑，宜捧入球細。（有線體育台62周四凌晨3時45分直播）
巴西領隊鄧加早前已經講明，今場熱身賽純粹為試陣，同觀察新人表現，因此大軍名單上有唔少二線兵，例如貝迪斯前鋒拿菲爾蘇比斯、利物浦中場盧卡斯，以及幾位於巴甲搵食土炮，而兩大入波泉源卡卡同朗拿甸奴都因傷缺陣，對巴西攻力影響甚大。
雖然鄧加早前補選近期曼聯表現唔錯路爾斯安達臣，佢雖然勤力跑動，不過射術實在令人不敢恭維，對巴西入波能力幫助唔大。
瑞典冇伊巴謙莫域
巴西今場靠晒依家西甲射手榜領先路爾斯法比安奴數胡，不過佢以往少有機會於國家隊上陣，能否發揮出西維爾水準，實屬疑問，至於羅賓奴近期狀態亦一般，大家切勿高估巴西今場入波能力。
另一邊廂瑞典仲大件事，冇國際米蘭前鋒伊巴謙莫域，雖然力雲達不來梅羅辛貝治今季有不俗表現，但今場對手畢竟係巴西，估計瑞典唔會貿然同對方鬥攻，羅辛貝治未必有發揮機會。而且睇番瑞典近期熱身賽表現，已經連續兩場冇波入，包括吞美國兩蛋，以及同土耳其互交白卷，要攻破巴西大門，談何容易。
http://football.on.cc/football/new/20080326/fbnewa0158x0.html
