世界盃亞洲區外圍賽第三階段分組賽,最受廣大同胞關注當然係A組中國隊於昆明主場迎戰澳洲。國足以往面對日韓等亞洲一線強隊,一向冇運行,今仗對手更係澳洲,更難被寄予希望。難得「袋鼠兵團」僅讓平半,Mic少認為上盤非常抵玩。(有線足球台61周三下午2時直播)
中國隊首仗分組賽作客一比一逼和伊拉克,總算執番身彩,但球隊之後東亞盃表現仍然冇起色,即使身為東道主,都不敵日本同南韓,只係最後一仗擊敗「細佬」北韓番個安慰獎,由此證明國足始終難登大雅之堂,無法同亞洲一線強隊抗衡,更何況今場對手係有歐洲球隊級數澳洲。
三大主力剛歸隊有影響
國足今次選擇位於高原昆明拓東體育場作主場,希望以高原氣候打擊對手,但其實真係聰明反被聰明誤,因為國足三位於歐洲搵食主將,鄭智、孫繼海同邵佳一都係歸隊,如果澳洲球員唔適應高原氣候,同樣對鄭、孫、邵三人亦有影響,「高原策略」隨時得不償失。事實上,中國隊早前亦曾經昆明同泰國踢場熱身賽,結果只同對手打成平手,「高原策略」似乎唔多有效。
去年交手澳洲贏兩球
至於「袋鼠兵團」雖然有愛華頓中場卡希爾及些路迪射手史葛麥當奴因傷缺陣,不過英超搵食基維爾、尼爾及門將舒華沙仍然在陣,再加上中場「意甲雙子」比斯安奴同格拿,球隊人腳依然鼎盛。雙方上年三月曾經於熱身賽交手,當時澳洲贏二比○,Mic少睇好佢今仗有力翻啅國足。
http://football.on.cc/football/new/20080326/fbnewa0155x0.html