動物和人類的關係一直都息息相關，尤其近年唔少朋友都喜歡養狗養貓，甚至養鼠類作為寵物，愛錫程度比愛錫子女不遑多讓，但動物其實都有吉凶之分，分分鐘會剋死主人都唔奇。不同民族對動物吉凶有不同的睇法，各位喜歡動物的朋友，近排如果成日頭頭碰著黑，可能真係同你屋企養既寵物有關都唔定！
對於忙碌的都市人來說，養寵物比起養子女要來得容易，至少不用勞氣教導，也不怕寵物會像子女一樣不孝順。對於他們來說，養寵物更可以是一種生活調劑，而且也可陪自己度過寂寞時分，令自己不會太孤獨。
不祥自來貓
近年不少人都喜歡養貓，一來方便照顧，二來貓比較獨立，較具個性，比狗的愚忠好玩得多。前人類養貓只為捉老鼠，古代人居住的地方比較大，所以經常有流浪貓偷偷走入家園追捕老鼠，古人認為自來貓是不祥的預兆，象徵家道將會中落，而且甚至會出現喪事，所以別家走失的貓來敲你的門，千萬不要放其入門內，最好都係送其去愛護動物協會便算。在中國古代，漢人更有自來貓必定會令主人陷入貧窮的傳說，所以大家千萬咪養自來貓。而鄂溫族人死後，更會把周圍的貓先捉掉，以防貓兒走過屍體，出現屍變。埃及亦有相近的傳說，貓爪會令屍體產生異變。台灣人則認為貓生仔的時候，千萬不要偷看，否則貓媽媽會把所有貓仔食晒落肚，而主人亦會從此交上厄運，頭頭碰著黑，陰功到不得了。
現在不少人以賣寵物為生，但作為主人，若自己飼養的貓生了孩子，送比人時，千萬記得一毫子都唔好收，否則又會行衰運，逢賭必輸，由富貴變成貧窮，衰足三年。養貓當然要睇下貓仔個樣得唔得意，但就千萬不要養白尾和白蹄貓，不過成隻白貓當然另計。如果只係四蹄踏雪或白尾的花貓，千祈唔好留係屋企，否則分分鐘要搞白事，因白屬喪相，極之不吉祥。
貓出生的月份亦有好壞之分，四月、六月出生的貓，特別勤力，見老鼠一定唔會放過，但五月、九月出世的貓就特別懶惰，乜都唔做，亦會令主人運氣轉差，所以家陣去寵物店買貓，記得睇下張出世紙呀！
狗哭惹災禍
狗是人類最好的朋友，中國古代已有不少有關狗的記載，滿族傳說其民族英雄努爾哈赤就曾經被狗救過命，因此滿族人禁止殺狗、食狗肉，違者一律收監。傳說好運的人吃了狗肉，會將好運更加催旺，但行衰運的人吃了狗肉之後，則會衰到貼地，必有大劫，無處可逃。
養狗最大的禁忌，就係無論狗仔多壞多頑皮，都千祈唔好打佢，因為如果打喊佢的話，就會好麻煩。因為狗喊將會有很多不幸的事情發生，包括：家裡出現喪事、水災、火災、賊劫、官非等，所以千萬唔好打到狗喊，否則自己交上惡運，真係與人無尤。
就狗的相學來說，如果狗仔的耳朵太貼頭顱的話，會對主人不吉利，有剋主人之兆，而如果狗身長腳短，亦不是一頭好狗，會特別容易招惹惡運，令主人無啦啦輸錢或同人發生爭執，不可不留意。
養公雞可以驅邪
以前細個大家都養過雞仔，不過多數細細隻就經已魂歸天國，但亦有小部分會養到變大雞。大家有所不知，原來養雞係有好多好處，雞的諧音和吉相同，所以養雞會帶來好運。
雞經常作為祭祀的祭品，所以有擋災驅邪之效，而雞還可以有驅鬼的作用，因為傳說鬼非常害怕聽到公雞啼，公雞會為人世間帶來光明，將惡鬼打回地府。但養雞人家，如撞上公雞不啼母雞啼的情況，就要特別小心，因為公雞不啼母雞啼，主人不死待何時，主人不出三、五日內必然會碰上死神光臨，點樣可以解決呢個災害呢？方法好簡單，就係將母雞的頭斬去，然後把雞頭放在竹竿和樹上，焚香拜祭一番，便可以消災解禍。所以大家若要養雞仔，最好揀雞公，咁一來可以擋邪，二來又唔使理佢啼定唔啼，母雞都係留番煲湯好過。
咪養白老鼠
早排不少人都會養下龍貓同老鼠類動物，由於無論係龍貓還是白老鼠，和街邊的坑渠老鼠其實都屬於同類型動物，所以可歸為同類研究。街頭老鼠一般都污糟邋遢，但由於街頭老鼠習慣偷食，所以行動十分敏捷，極少會被人發現。如果你見到老鼠在你面前走過，就代表你行正衰運，而且千萬唔好追打老鼠，否則你的惡運會雙倍來臨。如果在街邊見到白老鼠的話，就更加大劑，隨時要為自己準備定白事，因為街頭老鼠搵食艱難，竟然可以畀你撞到白老鼠，你話幾咁邪，唔死都算執番身彩。所以大家如無必要都唔好係屋企養白老鼠，留番係實驗室用來做實驗算，就算要養龍貓都要揀有顏色既龍貓，否則養動物養到剋死自己，咁又何必呢？
